ភ្នំពេញ
៖ នាយកដ្ឋានកម្មសិទ្ធិបញ្ញាក្រសួងពាណិជ្ជកម្ម
សហការជាមួយសមាគម
React ដែលជា សមាគមន៍មិនរកប្រាក់ចំណេញមានសមាជិកចំនួន ១៧៥ក្រុមហ៊ុន ព្រឹកថ្ងៃទី១៥ ខែមករា ឆ្នាំ២០១៤ នៅសណ្ឋាគារសាន់វ៉េ បានបើកសិក្ខាសាលាពាណិជ្ជកម្មអន្តរជាតិ២០១៤ ស្តីពីកិច្ចសហប្រតិបត្តិការថ្នាក់ជាតិ ក្នុងការអនុវត្តច្បាប់កម្មសិទ្ធិបញ្ញាចំពោះការក្លែងបន្លំ ដែលបានកំពុងតែរងគ្រោះយ៉ាងធ្ងន់ធ្ងរដោយការក្លែងបន្លំម៉ាកទំនិញ ល្បីៗរបស់ខ្លួន។
លោក អប់ រ៉ាឌី អនុប្រធាននាយកដ្ឋានកម្មសិទ្ធិបញ្ញា ក្រសួងពាណិជ្ជកម្ម បានឲ្យដឹងថា សិក្ខាសាលានេះ ដែលមានការចូលរួមពីស្ថាប័នពាក់ព័ន្ធ និងមកពីស្ថាប័នអនុវត្តច្បាប់សរុបចំនួន ៤០រូបចូលរួម ក្នុងគោលបំណង ដើម្បីចូលរួមចំណែកក្នុងការកសាង និងពង្រឹងសមត្ថភាពជូនស្ថាប័នអនុវត្តច្បាប់កម្ពុជា ដែលអាចបំពេញការងាររបស់ខ្លួនឲ្យបានកាន់តែមានប្រសិទ្ធភាពឡើង ក្នុងការអនុវត្តន៍ច្បាប់កម្មសិទ្ធិបញ្ញាក្នុងប្រទេសកម្ពុជា ក៏ដូចជានៅក្នុងតំបន់អាស៊ានទាំងមូល ស្របតាមផែនការសកម្មភាព ថ្នាក់តំបន់ស្តីពីការអនុវត្តកម្មសិទ្ធិបញ្ញារបស់ ASEAN ២០១១-២០១៥
ក្នុងគោលដៅរួមបង្កើតសហគមន៍សេដ្ឋកិច្ច ASEAN ក្នុង ឆ្នាំ២០១៥។ ជាពិសេសតម្រូវឲ្យរដ្ឋបាលគយ និងស្ថាប័នអនុវត្តច្បាប់ដែលពាក់ ព័ន្ធក្នុងប្រទេសជាសមាជិកអាស៊ានទាំង ១០ នឹងប្រកាន់យកតួនាទីដ៏សំខាន់ ក្នុងការកំណត់នូវអត្តសញ្ញាណទំនិញក្លែងក្លាយ ដែលបានកំពុងតែឆ្លងកាត់ព្រំដែនចូលទៅក្នុងសហគមន៍ ASEAN។
សិក្ខាសាលា
នេះបង្ហាញជូនផងដែរអំពីនិន្នាការក្លែងបន្លំផលប៉ះពាល់ នៃទំនិញក្លែងក្លាយ ការចែករំលែកបទពិសោធន៍ និងភាពវៃឆ្លាតថ្មីល្អៗនៃការអនុវត្តច្បាប់កម្មសិទ្ធិបញ្ញា ដើម្បីជួយឲ្យស្ថាប័នអនុវត្តច្បាប់នៅកម្ពុជា អាចកំណត់អត្តសញ្ញាណទំនិញក្លែងក្លាយ ដែលឆ្លងកាត់ព្រំដែនឲ្យបានកាន់តែប្រសើរឡើងថែមទៀត៕
No comments:
Post a Comment